Do you believe in god? So you believe in me.
The Hostile
Une honetantxe, imajinatzen hasita,
gauza asko imajina nitzake.
Abaltzisketako 80 urteko aitona rock kontzertu bati
begira, aurpegi kuriosoz,
edo zubi bat bere buruaz beste egiten,
gor-mutu bat Tokioko diskoteka batean dantzan,
amaitu gabeko esaldi bat zaborrontzian,
edo bonbardino jotzaile bat McDonaldsen bazkaltzen,
adibidez.
|
|
0 iruzkin
Irakasleak esaten zuen, munduko mapa seinalatuz:
- Gu hemen gaude.
Orduan, iruditzen zitzaion hatz erakusle erraldoi batek birrindu behar zuela ikastola, alboko jolas parkea, supermerkatua, zinema, eta harrapatzen zuen guztia.
|
|
2 iruzkinak
Arerioari aztarnarik uztea akats larria izan daiteke lurralde ezezagunean sartzen garenean. Orbela leun zapaltzen dugu pausuak hotsik sor ez dezan, eta ez dugu bidezidorrik hartzen badaezpada. Helburua argia da (etsaiak ezin digu ahulgunerik aurkitu), ez, ordea, estrategia. Isiltzea aukeratzen dute batzuek. Bada musukatzen ezkutatzen denik ere. Edo larrua jotzen. Gorputza gabeziak mozorrotzeko metodo gisa erabiltzea ez da berria, garrantzitsuena gabeziak mozorrotzea denean (eta ez oheratzea). Goizeko argiak salatzen gaituelako janzten gara azkar eta presaka. Eta lurralde ezezagunean barneratzen gara berriro, koitaduok, istant batez ederrak izan garela ohartzeke.
|
|
2 iruzkinak
Badoala esan dit (eta ez zaio arrazoirik falta)
konprenituko duen norbaiten xerka, are gehiago, konplizitate totalarekin baino ez dela aseko
(azpimarratu du), agian mutazioen kontua dela desberdin sentiarazten duena (baliteke arrazionalizazioa gaixotasun larri bat izatea ere).
Horregatik aukeratu du beste planeta bat,
Martitz (demagun).
(Aipatu dit) Denok sinesten dugula hierarkian pertsonez ari bagara (baita auto-estima baxukoek ere)
eta inguruan dituen behe-mailakoak baino gorago eta urrun dakuskien eredu jainkotuen azpitik sentitzen dela (oro har).
Eta nik irribarre egiten irakatsi aurretik,
badoala esan dit (eta joan egin da).
|
|
2 iruzkinak
Begiak itxi gabe ere, tarteka nabaritzen dut nola nire gorputzetik askatu eta gela honen dimentsioen jabe egiten naizen. Barneko kartzela madarikatua are babestuago sentitzen da mugak ikusten ditudan bitartean. Eta zer esan ihesbideaz. Atetik gelara baino, neure burura sartuko banintz bezala da (Malkovichek egin zuen behin), krisketari bira eman osteko hasperen lasaia. Norbere izatea babestuta sentitzen den hartara zabaltzen da agian. Paradisua gotorlekuetan bilatzen dutenak dira biktimak.
Bero egiten du eta seguruenik, eguzkia ikusiko nuke pertsianak igoko banitu.
|
|
2 iruzkinak
Kexu da jendea autobusak doazela azkarregi eta umeek zebrabideak
gurutzatzean bi aldeetara begiratzeari utzi
diotela asfaltoaren egoera tamalgarriaz zer esan
pitzadurak
lurrean
bakarrik
ikusten
dira
musika altuegi tabernetan sobreko zopa hotza eta autobuseko
elkarrizketak etxeko lan gaindosiaz isilik
ez geratzearren
Irakeko gerra txarra da nire jakituria elikatzen dut
reality showekin eta zein den polita
hitz hau profesional izango naiz handitan argindarra garesti nork
nahi du bizimodu hobea nork jo nahi du kontrabaxua jazz talde
batean
ez orain ez da jazz entzuten orain ez orain house tabernetan baina
altuegi
eta kexu da jendea
sozialistak sare sozialetan iraultzan lapurrek gau piroteknikoetan egiten
dute lan batez ere akabo alkateei erori zaie ilea
prentsak definitzen omen gintuen baina kioskoak itxita daude eta
nor garen ez dakigu horregatik ikusten dugu futbola.
|
|
3 iruzkinak
Kontrako eztarrian letra-zopa bat ezpainak
josita eta denak berdin jarraitzen
du eskerrak
agian.
|
|
2 iruzkinak
Hasiera
marra eten hura zela erabaki zuen errepide
bazterreko ibiltariak (artaziak eskuan),
besterik gabe zelako
desberdina.
Inaugurazioetako zinta ebakia.
Orekari eusteko sokak estali nahian egin
zuen bidea.
Alferrik, baina,
aurkako noranzko autoen ispiluek erakusten zioten bere burua,
etengabe.
Eta izerdi tantaka egin zion ihes indarrak.
Amaiera
marra eten hura zela erabaki zuen errepide
bazterreko ibiltariak (hankapean lohia),
besterik gabe zelako
antzekoegia.
Eta amorruz zapaldu zuen.
Atzera begiratzean,
fideo mordoa ikusi zuen lokatzezko zopan.
Ez du barkatzen oinatzen arrastoak ere irensten dituen errepideak.
|
|
0 iruzkin
Zertarako gauden hemen: parentesi artean irribarre egin eta isilik desagertzeko gero, norbera bere pitzaduratik.
Harkaitz Cano
_______________________________________________________________
Norbere gaztelu karratuan babesten gara eta
paisaia berdeak ipintzen ditugu ordenagailuetako pantailen bestaldean.
Muxuak garaipen ikurrak dira
eta banderak balkoietan zintzilik daude
bizilagunek benetan sinesten dugunaren berri
izan dezaten.
Erortzeari diogun beldurragatik hasi gara eskumuturrekoak janzten.
Gu beti segurutik.
Heldu bihurtu ginen Errege Magoen existentzia ezaren berri izan genuenean eta geroztik
ez dugu ipuinetan sinesten.
Gutarrak gurtu eta etsaiak gorrotatzen gabiltza azkenaldian baina
jainkoa eta deabrua elizkoi atzerakoien kontuak dira.
Eta hil ostean ere, egunkaria eskelez josteaz ardura dadila sendia,
jendeak ikus dezan maitatuak ginela.
|
|
0 iruzkin
Neure buruarekin hasi naiz hizketan, hormen erantzunik jasotzen ez nuela eta. Haserre antzean itaundu dit ea zertara datorren orain bat-bateko interes hau, hainbeste urtetan zehar ahaztuta eduki ostean. Barkatzeko, zer esango nion ba. Aipatu diot nola gurutzegramak ezin bukatu aritzen garen, entziklopediak astintzen ditugulako kopetan itsatsita daukagun hitzaren bila. Hasperen luzez nire azalpena onartuta hasi zait hizketan, garbi. Ez du errusiarra ematen.
Moskuko kafetegietan ezki-ura zerbitzatzen hasi direla kontatu dit baina oraindik kafea eskatuz gero ere, zer edo zer edukitzen dutela almazenean gordeta. Gobernuak alkoholismo-tasak jaitsi asmoz hartutako erabakia omen da, ez kafeak alkohola duelako, legea tabernetan ere betetzen hastear direlako baizik. “Leninekin ez zen holakorik pasako!” bota du ozen, eta komunismoaz hasi zait oharkabean.
Ez diot pixka batean berriro hitz egingo gogaikarri horri.
|
|
Iruzkin 1
Ez ote dugun gehiegi sinesten mugetan.
Ez ote gabiltzan definizio baten bila, hitzetan harrapatuta geratzeko
beldurrik gabe.
Ez ote ditugun zakuak maite, ez ote gabiltzan gezur ehizan.
Zebrabideak gurutzatu nahirik, izenondo aldaezin bati eskutik helduta eta
semaforoek itsututa.
Hain ziur eta hainbeste kontraesanekin.
Ez ote dugun lo lasaiegi egiten
kaiola barruan ere.
Sikiera txoriak bagina…
|
|
5 iruzkinak
Orraziaren itzalak estalirik,
heriotzarako prestatu zen zorria eta
zelai leunetan belaunikatuta
barkamena eskatu zuen, ozen,
bizkarroitasuna beste aukeren faltan
hautatu zuela desenkusatuz.
|
|
Iruzkin 1
Asmo handiz eraikitako ametsak estaltzen ditu
denboraren urtegiak,
etengabe.
Hondoratutako ilusioz osatzen
jarraituko dugu,
iraganean igeri egiteko beldurrez.
Ezkutuan jarrai bezate pitzaduretako altxorrek,
harrizko zubiek eta kanpandorre hutsek.
Noraezean ibiltzeko arriskua badago ere,
errazagoa da urpean
begiak ixtea.
|
|
3 iruzkinak
Elefante beltzak ez du zuria maite,
ez dituelako bere orroak errepikatuko,
ezinezko zaiolako bere oinatzei jarraitzea,
eguzkiak erretzen diolako azala.
Jendea ere ispiluak erosten hasi omen da, oheko bakardadea disimulatzeko edo.
|
|
0 iruzkin
Zebra erdi
Mick Ostolaza is proudly powered by WordPress and Drunkey Love.
Azken iruzkinak