Mick Ostolaza

Kobratzailearena

ostolaza — Sat, 15 Nov 2008 23:18:47 +0000

Kobratzeari utzi zenion behin,

eta nik,

nik zure ahotsa entzuten dut

kartera irekitzen dudan bakoitzean.

Zorrak kitatuko ditut baina,

gaxuak zu eta zutarrak.

Erreklamazio orriak

ostolaza — Fri, 14 Nov 2008 21:51:27 +0000

Oroitzapenak saltzen ditut kale ertzeko dendan.

Nahi duenak eskuragarri ditu erreklamazio orriak.

Egozentrikoarena

ostolaza — Tue, 21 Oct 2008 21:13:26 +0000

Gaua da, euri tantek pertsiana zulatu nahi dute eta Mick bere logelan dago.

Gauza material den orori heltzen dio: kitarra hartu du-hiru akorde jo eta utzi egin du-, musika entzuten hasi da- kanta erdian itzali du-, liburu bati ekin dio- baina ezin ditu lau hitz jarraian irakurri…

Eta azkenik ordenagailua ireki eta bere buruaz idazten hasten da.

Orain ohartzen da zein egozentrikoa den.

Zeharka

ostolaza — Fri, 17 Oct 2008 14:54:22 +0000

Zeharka hitz egin bazenidan, ez nizun ulertu.

Ez bazenidan zeharka hitz egin, ulertu nizun.

Kontua da zeharka hitz egin zenidan ala ez.

Tximeleta

ostolaza — Sun, 14 Sep 2008 20:08:25 +0000

Tximeleta izan nahi duen

Harra naizela uste dut.

Amets egiten dut,

Hegoak hazi zaizkidala

Baina goizean esnatzean,

Tarteka,

Ohartzen naiz ezetz,

Oraindik asko falta zaidala

Tximeleta izateko.

Eta neure burua kontsolatzen

Hasten naiz,

Esanez,

Agian hobe dela horrela,

Besteak bezalako har bat izatea.

Bai baitakit

Tximeletek bizia labur dutela.

Koaderno horia II (eromena)

ostolaza — Tue, 02 Sep 2008 20:24:54 +0000

Gauero begiratzen diot erlojuari,

azaldu ez zinen egunean bezalaxe.

Ordutik parke hartako arbustoak

asko hazi dira.

Eta nik beste espaloira pasatzen

jarraitzen dut,

aldatzeko,

ez omen da ona kalea zuzen

zeharkatzea.

Hala dio medikuak,

nire bizar urdindua baino urte

gehiago biziko naizela oraindik.

Baina bakarrik bizitzeko,

hobe bizarra moztu.

Plantxatzen ikasi dut ordutik,

aizu,

eta gustuko dut.

Ur beroaren lurrunak

zure hatsa gogorarazten didalako,

agian.

Edo, besterik gabe,

gustuko dudalako.

Baina hala ere,

arropak ez dit zuk zenuen

usain hura hartzen.

Asko saiatuagatik,

alferrik da.

Agian lixiba gehiago probatu behar nituzke,

baina diruak ihes egiten dit

gaueroko ronetan.

Zugandik gutxi ikasi nuen,

ez nizun arretarik jartzen,

eta pena dut.

Agian, maitatzen soilik irakatsi zenidan.

Baina nire zakurrari jaten ematera

joaten naizen bakoitzean

maitatzen ahaztea desiatzen dut.

Jada hau ez delako zoriona,

eromena baizik.

Koaderno horia I

ostolaza — Tue, 26 Aug 2008 20:27:27 +0000

Egunak ez dira alferrik pasatzen.

Egunero ari naiz,

Bizitza eraikitzen,

Zer izan nahi dudan pentsatzen,

Nire benetako ni-a sortzen.

Badakit etorkizuna,

Argia ala iluna

Izan daitekeela,

Eta iluntasunari

Beldur izateari

aspaldi utziagatik,

bakarrik naiz,

gau ilunean.

Bakardadeari

Beldur diot

Nahi dudana

Ez denean.

Iraganari egin ohi diot barre,

Ez orainari.

Askotan ohartu gabe

Bihar gaurkoari egingo diodala.

Beldur naiz,

Hartu beharreko konpromezuen beldur.

Nahiz eta egin beharrekoa jakin,

Ez dut gaur egingo,

Hobe bihar.

Uste dut,

Gehiegi gustatzen zaidala

Nire inuzentzian zoriontsu izatea.

Ahmed

ostolaza — Wed, 30 Jul 2008 19:24:00 +0000

Ahmedek ez du lagunik. Klaseetara joaten da eta bazkaltzeko zerbait jan ostean arratsaldea ordenagailuaren aurrean igarotzen du. Ordenagailuak errespetatu egiten du: berak agindutakoa bete eta arparik ez jo.

Gaur goizean eskolara eguzkitako betaurreko moderno batzuekin sartu da Ahmed.

- Oh, Ahmed, you have very beautiful glasses- esan dio isilik egon ezin duen klaseko oilarrak.

Ahmedek burua jaitsi du. Bera ez da halakoa. Ez da besteak bezalakoa.

Kalean topatzean ere, juxtu juxtuko agurra botako dizu. Eta jendeak ixila eta ezatsegina dela esango dizu.

Niri, ordea, gustatzen zait.

Ni ez naiz hemengoa

ostolaza — Mon, 28 Jul 2008 21:54:49 +0000

Ohartzen naiz, tarteka,

leiho honetatik begira jartzen

naizenean,

ez nagoela nire lekuan.

Xake taulatik kanpo dagoen

peoia naiz.

Puzzle ia osatuaren

galdutako zatia.

Eta fitxa horiek

ez dute “fitxatasunik”

euren tokian ez badaude.

Nik ere,

“ni” izateko,

nire betikoa behar dut

inguruan.

Nire etxea, nire hizkuntza

eta nireak.

Zoriontsu

ostolaza — Wed, 23 Jul 2008 21:40:43 +0000

Ez dut sortu

Poemarik ederrena.

Ezta sortuko ere.

Ez dut eman

Barruan dudan onena.

Ezta emango ere.

Ez naiz

Irabazlea.

Ezta izango ere.

Ni,

Ez nintzen jaio

Onena izateko.

Baina,

Abesti batek

Malko bat lapur diezadake.